BEBANTEN

TEGESING BEBANTEN

Bebanten/upakara punika kawentenan nyane tigang soroh, inggih punika :

a. Sorohan banten pangresikan, kawigunan nyane anggen sarana mareresik/mersihin wewanten lan sakancaning sarana upakarane sami lan pelinggih-pelinggihe sami miwah arca pralinggan Ida Bhatara, rawuhang ring manusane sami maka damuh Ida Bhatara.

b. Sorohan bebanten pinaka pralingga Ida Bhatara, menekadi banten sesayut, banten pangenteg linggih lan sane siyosan.

c. Sorohan bebanten/upakara sane pinaka hidangan/suguhan sane kahatur ring Ida Bhatara sami.

1. Banten Byakaon

Mawit saking bawos baya lan kaon. Baya artos nyane sekancaning sane kabawos mayanin sane wenten ring sajroning upakara lan pralinggane sami, rawuhang sane wenten ring sajroning anggasarirane, sane pacang ngardinin pikobet ring sajroning pidabdab/parilaksana ring kauripane puniki. Kaon artos nyane ngicalang, mangdane sekancan pikobet-pikobet ring sajroning ngemargiang yajña, utawi sane wenten ring sajroning anggasarirane, dumugi prasiddha ical.

Banten bayakaon = maka sarana ngicalan sekan-canin pikobet-pikobet sane nenten becik, dumugi siddha galang apadang.

2. Bebanten Tatebasan Durmanggala

Mawit saking bawos Dur lan Menggala/bregala, Dur artos nyane doh/ngedohang/menjauhkan. Menggala/bregala artos nyane keletehan, banten tatebasan dur-manggala pinaka sarana anggen ngedohang/ngicalang sekancaning sane ngeletehin ring sajroning upakara miwah ring sekancan pralingga-pralinggan Ida Bhatara, maka unteng taler maka sarana ngicalang ring kawen-tenan pikahyun/manahe sane kaliput antuk bendu utawi krodha, drenggi iri hati lan sane siosan, sane pacang ngawinan leteh ring sajroning kauripane puniki. Banten Durmanggala = suksmanyane maka sarana anggen nge-dohang/ngicalang sehananing keletehan ring pikayun.

3. Banten Tatebasan Prayascita

Mawit saking bawos tebas lan prayascita, tebas artos nyane maripurnayang, prayascita artos nyane sajroning mapikahyun. Tatebasan prayascita maka sarana anggen maripurnayang pikahyun dumugi prasiddha hening tur setata ajeg. Bilih-bilih rikala nyagra kawentenang yajña, mangda setata kedasarin antuk pikahyun sane hening tur setata ajeg riantukan kawen-tenan kawisayan pikahyun/manahe punika banget sakti tur mawisesa pisan, tur banget banal pisan, meweh antuka pacang ngamel utawi negul.

4. Banten Pangulapan

Banten Pangulapan maka sarana anggen nglap-ulapin = ngawukin = ngelinggihang = mensthanakan utawi ngecapang mangdane prasiddha pepek malih premana lan kharisma sang sane kaulapin punika dumugi prasiddha ajeg tur pageh ring sajroning angga sarira nyane. Masarana antuk sangga urip, sangga artos nyane sanggah = lingga = angga sarira. Urip artosnyane kauripan = premana = jihwa. Banten pangulapan suksmannyane ngulapin Sang Hyang Premana dumugi prasiddha ajeg tur pageh ring sajroning kauripannyane.

Ida Panditha Mpu Jaya Wijayanandha

Griya Kutuh

Jln. Ciung Wanara No. 8 Kuta