Suaran Asu (Lolongan Anjing)

Auuuuuuu......

Yening dasare wantah kakirangan, sering ugi papinehe kakurung olih pakewuh. Ring sapunapine sering dados kali, tat kalaning kaliput manahe dening kala brakhmantia, lali ring paileh padumadiane ka mercapadha. Indik punika sane ngaliput manah titiang wengi puniki. Duk punika titiang nenten nunas. Somah titiang nemdep tan matanjenan kadi dibi puane. Ipun itep majajaitan, nyait eteh-eteh maturan ka Pura Panti ring dinane benjang.

Saking ituni ipun brangti, santukan gajih titiange telas mapotong ring kantor. Sane malipetan wantah kwitansi lan nota-nota kewanten. Mapotong bank, malih mapotong Koprasi, mapotong Puskopat, muah lianan malih.

Tan rumasa jantos tampek tengah wengi titiang magadang kijap-kijap metekin igan-igan balene ring pasarean. Men Putu somah titiange sampun masare nyangkutin cening titiange I Putu lan adin-adinnyane masaput anduk uus bolong. Doh kaler kauh, kapiragi suaran asu ngongkong ngulun ngawang-ngawang malih saru malih janten, ngawe rerambangan titiange kambang rumbang sayan ngedohang, eling ring indike nguni daweg sareng berjuang melanin Kemerdekaan Jagate.

Duk punika suaran asune pinaka sirena, wangsit pengrauh mesehe. Sapunika taler suaran guak, suaran cekcek sami marupa wangsit dados tatengeran duk punika.

Manah titiange sayan peteng tur sayan meteng-metengang sakadi peteng dedet jagate wengi punika. Suaran asune sayan samar saru lan suaran sarwa prani muah gumatat gumitipe tan kapiragi malih........

Wengi punika rauh penghubung saking M.B.O.-1), makta prentah mangda pasukan D.O.B.-2), brangkat wengi punika ngariinin pasukan induk di bawah pimpinan Pak Rai sane jagi berangkat dinane benjang ngedas rahina ngungsi Desa Bon. Pasukan P.M.C.-3) mamargi riinan, uus punika wau pasukan .D.O.B, raris pasukan Induk, pinih ungkur wau pasukan palang merah. Sapunika runtutan pasukane satunggil berangkat.

Titiang dados anggota pasukan D.O.B duaning asapunika titiang berangkat ungkuran ring pasukan P.M.C punika. Rauh ring bangkiang bukite nriping peteng dedet, pateh kedate ring ngideme. Makta Sundih tan dados, mangda tan keni katangehang olih imeseh. Pengubung Penunjuk jalane mapatinget, mangda sami anggota pasukane masumpang wong taru ring kuping suang-suang, mangda keni antuk ngelingin timpal, santukan wong taru punika ngendih kadi endih kalimayahe. Samaliha mangda sami saling gisi sabuk mangda sampunang palas. Yen jantos palas, sinah jaga paling santukan tan panggih lubukan margi.

Tan dumade makanten endih nyemporot kakalih makembaran, sayan sue sayan nampek. Timpal-timpal titiange pada saling takenin, nanging sami pada tan uning.

Sayan sue sayan tampek. Manah titiange sayan takut. Tan dumade piragin titiang ring ajeng anak majritan.

- Aduuh, deweratu …..  Jro Gde lunga ……. Dewaratu.

- Elingin titiang punika jritan Penghubunge ring ajeng. Dereng titiang polih nangkisang sikian, makecos macan ageng belang gading ring samping titiange, sinambi nglur kabinawa. Titiang bah nungkayak katulung-tulung…….

- Beli….. beli !!!!!!!!!!!!

Titiang kagosah olih somah titiange. 

- Ngengken dadi beli ngeling katulung-tulung ? 

- Sapunnika pitakennyane sada runtag. Muannyane tan malih masemu bendu kadi ituni. Titiang ngusap-usap paningalan, sinambi nuptupang manah. Angkian titiange runtag, ulun atin titiange ngejer nandang takut.

- Beli….. ek….. embeli, nak ngipi mara………

- Ooo, ngipi? Apa ipiang Beli ?

- Anu ……. ngipi………

Sasampune titiang nuptupang manah tur ngingetang ipiane wau, raris titiang nuturang sapari indik ipian titiange wau. Rumasa liman somah titiange alus nempuh sinambi ngusap-usap gidat titiange sane mangkin sampun lengar. Saking gidat raris ngusap bok, makacihnan ipun tresna kapiwlasasih.

Tumuli ngangsehang titiang ngelanturang mapajar. Memene …… aget lacure memene anggon beli somah buka jani. Aget baane beli enu idup. Saking swecan Ida Sang Hyang Widhi, malipetan uli panyingkiran, tur katemu masomah tekening Memene. Nah, lacure….. baane idupe buka kambene arirang yen penekang entude ngenah, yen Tuunang pungsede malalung. Tolih titiang somah titiange ipun bengong tan dados ngucap. Tumuli Titiang nglanturang malih.

Sujatine pepes beli nyesel awak, nguda dadi beli enu idup. Yen pet beli mati di penyingkiranne malu, tusingja beli nepukin pakeweh buka jani.

Kolongan titiange tuh seket tan dados mojar malih. Somah titiang taler siep tan pasaur. Wau tolih titiang kantenang titiang ipun nguntul sinambi ngusap yeh paningalannyane.

- Aduh….. beli. Ede ja nyambat buka keto, beli. Tiang takut ningehang unduk sengsara beline dugase nyingkir, berjuang ngetohin gumi, satmaka beli maplalianan aji urip. Jani tiang ngrasa beli, keweh tiange jani di gumine suba merdeka, tusing ada artine yen saihang tiang tekening pakeweh beline dugase berjuang nindihin kemerdekaan gumine.

Sapunika somah titiange lancar mapasihin, nanging asemu sedih.

Somah titiange siep. Titiang bengong minehin suksman papasih somah titiange iwau. Kandugi titiang makesiab ngraseyang baong titiange kagelud. Nanging saruang titiang mangde tan katangehan. Somah titiange nampekang sikian sada manying.

Beli…… ek….. beli.

Olih: Made Sanggra.

Sumber: Basa Bali kelas XI Semester Genap